കുമാരനല്ലൂർ: കോട്ടയം കുമാരനല്ലൂരിൽ പിക്ക് അപ്പ് വാനിന്റെ ഡോറിൽ തട്ടി മറിഞ്ഞു വീണു സ്‌കൂട്ടർ യാത്രികന് ദാരുണാന്ത്യം. കുമാരനല്ലൂർ പൗർണ്ണമിയിൽ ഉണ്ണികൃഷ്ണൻ (55) ആണ് മരിച്ചത്.
ഇന്നലെ വൈകിട്ട് കുമാരനല്ലൂർ മേൽപ്പാലത്തിന് സമീപമായാണു അപകടം ഉണ്ടായത്. റോഡിന്റെ വശത്തു പാർക്ക് ചെയ്തിരുന്ന പിക്ക് അപ്പിന്റെ ഡോർ പെട്ടന്ന് തുറക്കുന്നതിനിടെ ഉണ്ണികൃഷ്ണൻ സഞ്ചരിച്ചിരുന്ന സ്‌കൂട്ടറിൽ ഇടിക്കുകയായിരുന്നു. ഇടിയുടെ ആഘാതത്തിൽ സ്‌കൂട്ടറിൽ നിന്നും റോഡിൽ തെറിച്ചു വീണ ഉണ്ണികൃഷ്ണനെ അപകടം കണ്ടു ഓടിക്കൂടിയ നാട്ടുകാർ ചേർന്ന് മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
കോട്ടയത്തു നിന്നും കുമാരനല്ലൂരിലുള്ള വീട്ടിലേക്ക് വരും വഴിയാണ് അപകടം ഉണ്ടായത്. പിക്ക് അപ്പ് വാനിന്റെ ഡോർ അലക്ഷ്യമായി തുറന്നതാണ് സ്‌കൂട്ടറിൽ തട്ടാൻ കാരണമെന്നാണ് ദൃക്‌സാക്ഷികൾ പറയുന്നത്.
