Kottayam LIVE is one of the emerging online news portal concentrating instant delivery of news from kottayam.
കോട്ടയം: മണ്ഡല-മകരവിളക് തീർത്ഥാടനവുമായി ബന്ധപ്പെട്ട് കോട്ടയം റെയിൽവേ സ്‌റ്റേഷൻ സന്ദർശിച്ച് ഒരുക്കങ്ങൾ വിലയിരുത്തി കേന്ദ്രമന്ത്രി സുരേഷ് ഗോപി.
തീർഥാടകർക്ക് ആവശ്യമായ അടിസ്ഥാന സൗകര്യങ്ങൾ ഉറപ്പാക്കാനും റെയിൽവേയുടെ മുന്നൊരുക്കങ്ങൾ വിലയിരുത്താനുമായി കോട്ടയം, ചെങ്ങന്നൂർ, കൊല്ലം എന്നിവിടങ്ങളിലാണ് സന്ദർശനം നടത്തുന്നത്. ശബരിമല തീർഥാടനവുമായി ബന്ധപ്പെട്ട് ഈ വർഷം കൂടുതൽ തീർഥാടകർ എത്താൻ സാധ്യതയുണ്ടെന്നും അതിൻ്റെ അടിസ്ഥാനത്തിൽ റെയിൽവേ മന്ത്രി അശ്വിനി വൈഷ്ണവിൻ്റെ നിർദ്ദേശപ്രകാരമാണ് റെയിൽവേ സ്റ്റേഷനുകളിലെ അടിസ്ഥാന സൗകര്യങ്ങൾ വിലയിരുത്താനായി സന്ദർശനമെന്ന് സുരേഷ് ഗോപി പറഞ്ഞു.
സീസൺ കാലത്ത് അടിസ്ഥാന സൗകര്യങ്ങൾ ഒരുക്കാനുള്ള ജോലികൾ റെയിൽവേ നേരത്തെ തന്നെ തുടങ്ങിയിട്ടുണ്ട്. കൂടുതൽ റെയിൽവേ സ്‌റ്റേഷനുകൾ സന്ദർശിച്ച് സൗകര്യങ്ങൾ വിലയിരുത്തുമെന്നും അദ്ദേഹം പറഞ്ഞു. ശബരിമല സീസൺ കാലത്ത് കൂടുതൽ സ്പെഷ്യൽ ട്രെയിനുകൾ അടക്കം കൊണ്ടുവരാൻ ആലോചനയിലുണ്ടെന്നും ചെങ്ങന്നൂർ അടക്കമുള്ള റെയിൽവേ സ്‌റ്റേഷനുകളുടെ സൗകര്യങ്ങൾ മെച്ചപ്പെടുത്തുമെന്നും കേന്ദ്രമന്ത്രി പറഞ്ഞു.
തീർഥാടകരുടെ തിരക്ക് കണക്കിലെടുത്ത് ആവശ്യമായ ക്രമീകരണങ്ങൾ ശക്തമാക്കും. യാത്രക്കാരുടെ എണ്ണം വർധിക്കുന്ന സാഹചര്യമുണ്ടായാൽ കൂടുതൽ സ്പെഷ്യൽ ട്രെയിനുകൾ അനുവദിക്കുന്നതും പരിഗണിക്കും. കഴിഞ്ഞ വർഷം ശബരിമല തീർഥാടനത്തിനായി 180 സ്പെഷ്യൽ ട്രെയിനുകളാണ് അനുവദിച്ചത്. ഇത്തവണയും ആവശ്യകത വിലയിരുത്തിയ ശേഷം കൂടുതൽ ട്രെയിനുകൾ അനുവദിക്കുന്ന കാര്യത്തിൽ തീരുമാനമെടുക്കുമെന്നും അദ്ദേഹം അറിയിച്ചു.
ശബരിമലയിലേക്ക് തീർഥാടകരെ എത്തിക്കാൻ അനുയോജ്യമായ റെയിൽ പാതകൾ ഏതാണോ അതുണ്ടാകുമെന്നും അങ്കമാലി - ശബരി റെയിൽ പാത സംബന്ധിച്ച ചോദ്യത്തിന് മറുപടിയായി കേന്ദ്ര മന്ത്രി വ്യക്തമാക്കി. കോട്ടയത്ത് എത്തിയ കേന്ദ്ര സഹമന്ത്രി സുരേഷ് ഗോപിയെ ബിജെപി ജില്ലാ പ്രസിഡന്റ് ലിജിൻ ലാലിൻറെ നേതൃത്വത്തിൽ സ്വീകരിച്ചു.
റബ്ബർ ബോർഡ് ചെയർമാൻ എൻ. ഹരി, ജില്ലാ ജനറൽ സെക്രട്ടറിമാരായ എസ്. രതീഷ്, ലാൽ കൃഷ്ണ, മേഖല വൈസ് പ്രസിഡന്റ് ടി. എൻ. ഹരി, ജില്ലാ വൈസ് പ്രസിഡന്റ് അരുൺ മൂലേടം, മണ്ഡലം പ്രസിഡന്റ് വി. പി. മുകേഷ്, മണ്ഡലം ജനറൽ സെക്രട്ടറി കെ. ശങ്കരൻ, ബിജുകുമാർ പി.എസ്., ഹരിക്കുട്ടൻ, യുവമോർച്ച ഭാരവാഹികൾ തുടങ്ങിയവർ സന്നിഹിതരായിരുന്നു.
