കോട്ടയം: മികച്ച ഹാസ്യാഭിനേതാവിനുള്ള സംസ്ഥാന ടെലിവിഷൻ അവാർഡ് കോട്ടയം സ്വദേശിയായ നസീർ സംക്രാന്തിക്ക്. മഴവിൽ മനോരമയിലെ പാരമ്പരയായ തട്ടീം മുട്ടീം,അമൃത ടി വിയിലെ കോമഡി മാസ്റ്റേഴ്സ് എന്നിവയിലെ അഭിനയത്തിനാണ് നസീർ സംക്രാന്തി അവാർഡിന് അർഹനായാത്. തട്ടീം മുട്ടീം പരമ്പരയിലെ കമലാസനൻ എന്ന കഥാപാത്രത്തെ എല്ലാ മിനിസ്ക്രീൻ പ്രേക്ഷകരും ഇരുകയ്യും നീട്ടിയാണ് സ്വീകരിച്ചത്. നസീർ സംക്രാന്തി എന്ന പേര് കേൾക്കുമ്പോൾ തന്നെ ഓർമ്മയിലേക്കെത്തുന്നത് വെള്ള ഷർട്ടും മുണ്ടും ധരിച്ചു കയ്യിൽ ഒരു ഡയറിയുമായി നിൽക്കുന്ന കമലാസനന്റെ രൂപമാണ്. 2011 മുതൽ നർമ്മ രസങ്ങൾ ചോരാതെ മഴവിൽ മനോരമയിലെ തട്ടീം മുട്ടീം പരമ്പരയിൽ കമലാസനനായി നസീർ സംക്രാന്തിയുണ്ട്. നിരവധി ചലച്ചിത്രങ്ങളിലും ചെറുതും വലുതുമായ വേഷങ്ങൾ ഇദ്ദേഹം ചെയ്തിട്ടുണ്ട്. 2014 ൽ മികച്ച ഹാസ്യ അഭിനേതാവിനുള്ള അവാർഡ് നസീർ സംക്രാന്തിക്ക് ലഭിച്ചപ്പോൾ മികച്ച ഹാസ്യ പരമ്പര തട്ടീം മുട്ടീം ആയിരുന്നു. ഇന്നലെ സംക്രാന്തിയിലെ വീട്ടിലെത്തിയ നസീർ കുടുംബാംഗങ്ങൾക്കൊപ്പവും സുഹൃത്തുക്കൾക്കൊപ്പവും സന്തോഷം പങ്കുവെച്ചു.
