കോട്ടയം: ക്രിസ്മസിന്റെ വരവറിയിച്ചു ഗ്രാമ-നഗര വ്യത്യാസമില്ലാതെ നക്ഷത്ര വിപണി ജില്ലയിൽ സജീവം. വിവിധ തരം നക്ഷത്രങ്ങളും അലങ്കാര ബൾബ് മാലകളും ക്രിസ്മസ് ട്രീയും തുടങ്ങി ക്രിസ്മസ് രാവുകളെ ആഘോഷമാക്കാനുള്ള എല്ലാവിധ സാധനങ്ങളും വിപണിയിൽ വിൽപ്പന ആരംഭിച്ചു കഴിഞ്ഞു. കോവിഡ് തീർത്ത പ്രതിസന്ധികൾക്കിടയിലും ക്രിസ്മസിനെ വരവേൽക്കാൻ ഒരുങ്ങുകയാണ് എല്ലാവരും. കഴിഞ്ഞ വർഷം ഉണ്ടായിരുന്നത്ര വിൽപ്പന ഈ വർഷം ഇതുവരെ നടന്നിട്ടില്ല. എന്നാൽ ക്രിസ്മസ് ദിവസങ്ങൾ അടുക്കുന്നതോടെ കൂടുതൽ ആളുകൾ നക്ഷത്രങ്ങൾ വാങ്ങാനും പുൽക്കൂടുകൾ വാങ്ങാനായി എത്തുന്നുണ്ട് എന്നും വ്യാപാരികൾ പറഞ്ഞു.
വിലവർദ്ധനവ് ഈ വർഷം വലിയതോതിൽ ഉണ്ടായിട്ടില്ല എന്നും വ്യാപാരികൾ പറഞ്ഞു. പേപ്പർ നക്ഷത്രങ്ങൾ,പ്ലാസ്റ്റിക്ക് കോട്ടിങ് നക്ഷത്രങ്ങൾ,ഇലക്ട്രോണിക്ക് ഓട്ടോമാറ്റിക്ക് നക്ഷത്രങ്ങൾ,ക്രിസ്മസ് ട്രീ,പുൽക്കൂടുകൾ,ഓട്ടോമാറ്റിക്ക് അലങ്കാര ബൾബുകൾ തുടങ്ങി നിരവധി ക്രിസ്മസ് ആഘോഷ സാധനങ്ങൾ വിപണിയിൽ ലഭ്യമാണ്. വീടുകളിലും ക്രിസ്മസിന്റെ വരവറിയിച്ചു നക്ഷത്രങ്ങളും ക്രിസ്മസ് ട്രീകളും ഒരുങ്ങിക്കഴിഞ്ഞു. രാത്രിയിൽ നഗരങ്ങളിലെ വ്യാപാര സ്ഥാപനങ്ങൾ സമ്മാനിക്കുന്നത് വർണ്ണശബളമായ നക്ഷത്രത്തിളക്കമുള്ള കാഴ്ചകളാണ്. വരും ദിവസങ്ങളിൽ വ്യാപാരം വർധിക്കുമെന്ന് പ്രതീക്ഷയിലാണ് വ്യാപാരികൾ.
അടുത്തയാഴ്ച്ചയോടെ കേക്ക് വിപണികളും കേക്ക് മേളകളും സജീവമാകും. കോവിഡ് മാനദണ്ഡങ്ങൾ പാലിച്ചു ക്രിസ്മസ് ആഘോഷിക്കാനുള്ള ഒരുക്കങ്ങളിലാണ് എല്ലാവരും.
