കോട്ടയം: കോവിഡ് കാലത്ത് മഹാദുരിതത്തിലായ ജനങ്ങളെ കുത്തിപ്പിഴിഞ്ഞ് ഇന്ധന വില വര്ധിപ്പിക്കുന്നത് തികച്ചും അന്യായമെന്നു മുൻമുഖ്യമന്ത്രി ഉമ്മൻ ചാണ്ടി.
ഈ മാസം ഇതുവരെ അഞ്ചു തവണയാണ് വില കൂട്ടിയത്. പെട്രോളിന് 86.61 രൂപയും ഡീസലിന് 80.74 രൂപയുമായതോടെ വന് വിലക്കയറ്റത്തിന് വഴിയൊരുക്കിയതായും അദ്ദേഹം പറഞ്ഞു. അന്താരാഷ്ട്രവിപണയില് ബെന്റ് ഇനം ക്രൂഡിന് വില കുറഞ്ഞുനില്കുമ്പോഴാണ് രാജ്യത്ത് വില കുതിക്കുന്നത്. കേന്ദ്ര-സംസ്ഥാന സര്ക്കാരുകളുടെ നികുതിയാണ് വിലക്കുതിപ്പിന്റെ പ്രധാന ഘടകം എന്നും ഉമ്മൻ ചാണ്ടി പറഞ്ഞു. ഒരു ലിറ്റര് പെട്രോളിന് 32.98 രൂപയും ഡീസലിന് 31.83 രൂപയുമാണ് എക്സൈസ് നികുതി.
കേന്ദ്ര- സംസ്ഥാന സര്ക്കാരുകള് അടിയന്തരമായി ഇടപെട്ട് വില നിയന്ത്രിക്കണം എന്നും ആവശ്യപ്പെട്ടു. യുഡിഎഫ് സര്ക്കാര് പെട്രോള് ഡീസല് വില കുതിച്ചു കയറിയപ്പോള് 4 തവണ അധിക നികുതി വേണ്ടെന്നു വച്ച് 619.17 കോടിയുടെ സമാശ്വാസം നല്കി. ഇടതുസര്ക്കാര് ചെങ്ങന്നൂര് തെരഞ്ഞെടുപ്പുവേളിയില് മാത്രം ഒരു രൂപയുടെ ഇളവ് നല്കി. കര്ണാടക തെരഞ്ഞെടുപ്പുവേളയില് മൂന്നാഴ്ച പെട്രോളിയം കമ്പനികള് വില കൂട്ടിയില്ല. വര്ധിപ്പിച്ച വിലയുടെ അധികനികുതിയെങ്കിലും ഉപേക്ഷിക്കാന് ഇടതുസര്ക്കാര് തയാറാകണം എന്നും ഉമ്മൻ ചാണ്ടി ആവശ്യപ്പെട്ടു.