എരുമേലി: എരുമേലി കാഞ്ഞിരപ്പള്ളി പ്രധാന പാതയിൽ കൊരട്ടിയിൽ നിയന്ത്രണംവിട്ട ഓട്ടോ മറിഞ്ഞു ഒരു വയസുള്ള കുട്ടി മരിച്ചു. മണങ്ങല്ലൂർ പള്ളിക്കശേരി പറമ്പിൽ അനൂപിൻ്റെ മകൻ അൻസിൽ (1) ആണ് മരിച്ചത്. ഇന്ന് വൈകിട്ടായിരുന്നു അപകടം ഉണ്ടായത്.
കുടുംബാംഗങ്ങൾ സഞ്ചരിച്ച ഓട്ടോ നിയന്ത്രണവിട്ടു മറിയുകയായിരുന്നു. അപകടസമയം ഓട്ടോറിക്ഷയിൽ മൂന്നു കുട്ടികൾ ഉൾപ്പെടെ അഞ്ചു പേരാണ് ഉണ്ടായിരുന്നത്. കുട്ടിയുടെ വല്യച്ഛനായ ദേവസ്യ (60) ആണ് ഓട്ടോ ഓടിച്ചത്. ഇയാളുടെ ഭാര്യ മോളി (57), മരുമകൾ ശാമിലി എന്നിവർക്കും പരുക്കേറ്റു. ബന്ധുക്കളായ അനന്തു, മെൽവിൻ എന്നീ കുട്ടികൾക്കും പരുക്കേറ്റു.
അപകടത്തിൽ ഗുരുതരമായി പരിക്കേറ്റ കുട്ടിയേയും അമ്മയേയും എരുമേലി സർക്കാർ ആശുപത്രിയിലും തുടർന്ന് പോലീസ് വാഹനത്തിൽ കാഞ്ഞിരപ്പള്ളി താലൂക്ക് ആശുപത്രിയിലും എത്തിച്ചു. അപകടത്തിൽ ഗുരുതരമായി പരിക്കേറ്റ കുട്ടിയുടെ മാതാവിനെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
