കോട്ടയം: കോട്ടയം നഗരമധ്യത്തിൽ തീ കൊളുത്തി ആത്മഹത്യക്ക് ശ്രമിച്ച മധ്യവയസ്‌കൻ മരിച്ചു. റിട്ടയേർഡ് ഗ്രേഡ് എസ്ഐ കോട്ടയം കൊല്ലാട് സ്വദേശി നെടുംപറമ്പിൽ ശശികുമാർ(60) ആണ് കോട്ടയം മെഡിക്കൽ കോളേജിൽ വെച്ച് ഇന്ന് പുലർച്ചെ മരണമടഞ്ഞത്.
ഇന്നലെ വൈകിട്ട് 4 മണിയോടെ കോട്ടയം തിരുനക്കര മൈതാനത്തു വെച്ചായിരുന്നു തീ കൊളുത്തി ആത്മഹത്യക്ക് ശ്രമിച്ചത്. 80 ശതമാനത്തിലധികം പൊള്ളലേറ്റ ശശികുമാറിനെ പോലീസും ഫയർ ഫോഴ്സും ചേർന്ന് കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയായിരുന്നു. പോലീസ് സേനയിൽ നിന്നും സ്വയം വിരമിക്കലിനുള്ള അപേക്ഷ നൽകിയിരുന്നു.
ജോലി ചെയ്തിരുന്ന സമയത്തെ അനുകൂലങ്ങൾ ഒന്നും ലഭിക്കാതിരുന്നതും കടബാധ്യതയുമാണ് ആത്മഹത്യക്ക് പ്രേരിപ്പിച്ചതെന്നാണ് വിവരം. സർവ്വീസിൽ നിന്ന് സ്വയം വിരമിച്ച ഇദ്ദേഹത്തിന് ഇതുവരെയും പെൻഷൻ ലഭ്യമായിരുന്നില്ല.
