കോട്ടയം: കോട്ടയത്ത് ഇരുചക്ര വാഹനയാത്രികനായ മധ്യവയസ്‌ക്കന്റെ ശരീരത്തിലൂടെ ബസ് കയറിയിറങ്ങി. അപകടത്തിൽ ഗുരുതരമായി പരിക്കേറ്റ കാലടി സ്വദേശിയെ മെഡിക്കൽ കോളേജിൽ പ്രവേശിപ്പിച്ചു.
കോട്ടയം കുമളി റോഡിൽ മണർകാട് മാധവൻപടിക്ക് സമീപം ഇന്ന് ഉച്ചകഴിഞ്ഞു മൂന്നു മണിയോടെയായിരുന്നു അപകടം നടന്നത്. ഏകദേശം 50 വയസ്സിനു മുകളിൽ പ്രായമുള്ളയാൾ സഞ്ചരിച്ചിരുന്ന ബൈക്ക് മാധവൻപടിയിൽ നിർത്തിയിട്ടിരുന്ന കാറിൽ ഇടിക്കുകയും ഇടിയുടെ ആഘാതത്തിൽ ഇദ്ദേഹം എതിരെ വന്ന കോട്ടയം-മണർകാട് റൂട്ടിൽ സർവ്വീസ് നടത്തുന്ന അൻസു ബസ്സിനടിയിലേക്ക് തെറിച്ചു വീഴുകയുമായിരുന്നു എന്നാണു ദൃക്‌സാക്ഷികൾ നൽകുന്ന വിവരം.
ബസ്സിനടിയിലേക്ക് വീണ മധ്യവയസ്‌ക്കന്റെ ശരീരത്തിലൂടെ ബസ് കയറിയിറങ്ങുകയായിരുന്നു. അപകടത്തിൽ ഗുരുതരമായി പരിക്കേറ്റയാളെ കോട്ടയം മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചു. കൂടുതൽ വിവരങ്ങൾ അറിവായിട്ടില്ല.
