കനത്ത മഴ: കോട്ടയം ജില്ലയിൽ റെഡ് അലേർട്ട് പ്രഖ്യാപിച്ചു.

കോട്ടയം: ജില്ലയിൽ കനത്ത മഴ തുടരുന്ന സാഹചര്യത്തിൽ റെഡ് അലേർട്ട് പ്രഖ്യാപിച്ചു. ജില്ലയിൽ ഇന്നലെ അർദ്ധരാത്രി ആരംഭിച്ച മഴ ജില്ലയിൽ ഉച്ചക്ക് ശേഷവും തുടരുകയാണ്. മണിമലയാറും മീനച്ചിലാറും വിവിധയിടങ്ങളിൽ കരകവിഞ്ഞു. കിഴക്കൻ മേഖലകളിലും മഴ ശക്തമായി തുടരുകയാണ്.  മുണ്ടക്കയം കോസ് വെയിലും കൂട്ടിക്കൽ ചപ്പാത്തു പാലത്തിലും വെള്ളം കയറി. ജില്ലയുടെ വിവിധ മേഖലകളിൽ റോഡുകളിൽ വെള്ളം കയറി. എരുമേലി കെ എസ് ആർ ടി സി ബസ്സ് സ്റ്റാൻഡിൽ വെള്ളം കയറി. എരുമേലി കൊരട്ടി പാതയിൽ വെള്ളം കയറി ഗതാഗതം തടസ്സപ്പെട്ടു. മുണ്ടക്കയം എരുമേലി റോഡിലും കാഞ്ഞിരപ്പള്ളി മുണ്ടക്കയം റോഡിലും ഗതാഗതം തടസ്സപ്പെട്ടു. ജില്ലയിൽ കനത്ത മഴ തുടരുന്ന സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് ജില്ലാ കളക്ടർ ഡോ. പി കെ ജയശ്രീ പറഞ്ഞു.