കുമരകം: പ്രതിസന്ധികളിൽ തളരാതെ കരുത്തുറ്റ മനസുമായി പ്രതിസന്ധികളെ അതിജീവിച്ചു തോൽപ്പിക്കുന്ന ജനീഷ് എന്ന ചെറുപ്പക്കാരനെ പരിചയപ്പെടാം. ഒരു ചെറിയ പ്രശ്നങ്ങളിൽപ്പോലും ജീവിതം അവസാനിച്ചു എന്ന് തോന്നുന്ന മനുഷ്യർക്ക് ഒരു മാതൃകയാവുകയാണ് ജനീഷ്.
കുമരകം സ്വദേശിയായ ജനീഷ് കള്ള് ചെത്താൻ ഒരു സുഹൃത്തിനു പകരക്കാരനായി പോകവേ തെങ്ങിൽ നിന്നും താഴേക്കു വീഴുകയായിരുന്നു.വീഴ്ചയിൽ സ്‌പൈനൽ കോഡിന് ക്ഷതമേൽക്കുകയും അരക്കു കീഴ്പ്പോട്ടു തളരുകയുമായിരുന്നു. പല ആശുപത്രികളിൽ ചികിൽസിച്ചെങ്കിലും ചലനശേഷി വീണ്ടെടുക്കാനായില്ല. അച്ഛൻ കമലാസനൻ 7 വർഷം മുൻപ് മരിച്ചു. തന്റെ പ്രതിസന്ധികളിലും സ്വന്തമായി അദ്ധ്വാനിച്ചു ജീവിക്കണമെന്ന ആഗ്രഹത്തിൽ ഫേസ്ബുക്ക് ഗ്രൂപ്പായ ഹാന്ഡിക്രോപ്സ് എന്ന സംഘടനയിൽ അംഗമാകുകയും അവിടുന്ന് പേപ്പർ പേനയുടെ നിർമ്മാണം പഠിക്കുകയും ചെയ്തു.
ഇന്ന് പേപ്പർ പേനകൾ നിർമ്മിച്ച് ദൈനംദിന ചിലവുകൾക്കുള്ള വക കണ്ടെത്താനുള്ള ശ്രമത്തിലാണ് ജനീഷ്. തികച്ചും പരിസ്ഥിതി സൗഹാർദ്ദമാണ് പേപ്പർ പേനകൾ. 5 മുതൽ 10 രൂപ വരെ വില വരുന്ന പേപ്പർ പേനകളിൽ പച്ചക്കറി വിത്തുകളും ജിനീഷ് നൽകുന്നുണ്ട്. ആവശ്യക്കാർക്ക് പേരെഴുതിയ സ്റ്റിക്കർ പേനയിൽ പതിച്ചു നൽകും. പേനകൾക്കൊപ്പം കുടകളും ജനീഷ് നിർമ്മിക്കുന്നുണ്ട്.
വിത്തുകൾ ഉൾകൊള്ളിച്ചു പൂർണമായും പേപ്പറിൽ നിർമ്മിക്കുന്ന വിത്തുപേനകളും കോഴിക്കോട് തൃശ്ശൂർ എന്നിവടങ്ങളിൽ നിന്ന് കുട കിറ്റ് കൊണ്ട് വന്നു തയ്ച്ചെടുക്കുന്ന ഗുണമെന്മയുള്ള എല്ലാത്തരത്തിലുമുള്ള കുടകളും ആണ് ജനീഷ് വീട്ടിൽ നിന്നും നിർമ്മിച്ചു വിൽക്കുന്നത്. സ്കൂളുകൾ,സംഘടനകൾ, ഓഫീസുകൾ,വിവാഹസൽക്കാരങ്ങൾ (കാർഡിൽ പിൻ ചെയ്യുവാൻ) ഒക്കെ ഈ വിത്തു പേനകൾ ഉപയോഗിക്കാം. സുമനസ്സുകളുടെ സഹായം ജിനീഷിനു ആവശ്യമാണ്. പേനകൾ ആവശ്യമില്ലാത്ത ആരും ഉണ്ടാവില്ല നമുക്കാവശ്യമായ പേനകൾ വാങ്ങാൻ ജനീഷിനെ സമീപിക്കാം. കൂടാതെ സൊസൈറ്റികൾ, സ്കൂളുകൾ, നമ്മുടെ സ്വകാര്യ ചടങ്ങുകൾ ഇവയിലെല്ലാം ഈ മനോഹര പേന അതിഥികൾക്ക് സമ്മാനമായി നൽകാം, ഇതോടൊപ്പം പ്രതിസന്ധികളിൽ തളരാതെ നീങ്ങുന്ന ജനീഷിനു നമുക്ക് കൈത്താങ്ങാവാം. ആവശ്യമനുസരിച്ചു നേരിട്ടോ കൊറിയർ വഴിയോ ജനീഷിന്റെ പക്കൽ നിന്നും കുടയും പേപ്പർ പേനയും വാങ്ങാവുന്നതാണ്. ശരീരിക ബുദ്ദിമുട്ടുകൾ തരണംചെയ്തു ഈ സംരംഭം മുന്നോട്ട് കൊണ്ടുപോകുവാൻ പറ്റുന്നത് സോഷ്യൽ മീഡിയയിലെ സഹോദരങ്ങളുടെ പിന്തുണനകൊണ്ട് മാത്രമാണ് എന്നും ജനീഷ് പറഞ്ഞു.
ജനീഷ്-ഫോൺ നമ്പർ- 7994909154
