കിടങ്ങൂർ: കിടങ്ങൂരിൽ റിട്ടയേർഡ് അധ്യാപകനെ വഴിയിൽ തടഞ്ഞു നിർത്തി 235000 രൂപ കവർന്നു. പാദുവ ശൗര്യാംകുഴിയിൽ ജോസഫിന്റെ(72) പണമാണ് 2 യുവാക്കൾ കവർന്നത്.
ഇന്നലെ വൈകിട്ട് 3 മണിയോടെയായിരുന്നു സംഭവം. വീട്ടിലേക്ക് മടങ്ങുകയായിരുന്ന ജോസഫിനെ കിടങ്ങൂർ-പാദുവാ റോഡിൽ ചൂരക്കാട്ട്പടിയിൽ വെച്ച് 2 യുവാക്കൾ വഴി ചോദിക്കാനെന്ന രൂപേണ വാഹനം തടഞ്ഞു നിർത്തുകയായിരുന്നു. വാഹനം നിർത്തിയ അധ്യാപകന്റെ കൈവശമുണ്ടായിരുന്ന പണം യുവാക്കൾ അപഹരിക്കുകയായിരുന്നു.
സഹകരണ ബാങ്കിൽ നിന്നും എസ് ബി ഐ യിൽ നിന്നും പിൻവലിച്ച പണം ബാഗിലാക്കി സ്‌കൂട്ടറിന്റെ സീറ്റിനടിയിൽ സൂക്ഷിച്ചിരിക്കുകയായിരുന്നു. സംഭവത്തിൽ ജോസഫ് പോലീസിൽ പരാതി നൽകി. കൃത്യമായ ആസൂത്രണത്തോടെയാണ് പണം അപഹരിച്ചിരിക്കുന്നത് എന്നാണു പോലീസ് നിഗമനം. സംഭവത്തിൽ അന്വേഷണം ആരംഭിച്ചതായി എസ് എച് ഓ കെ.ആർ ബിജു പറഞ്ഞു.
