കോട്ടയം: പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന മലയാള ചിത്രം കടുവയുടെ ടീസർ പുറത്തിറങ്ങി. കടുവാക്കുന്നേല്‍ കുറുവച്ചൻ എന്ന കഥാപാത്രമാണ് ചിത്രത്തിൽ പൃഥ്വിരാജിന്റേത്.
സംയുക്ത മേനോൻ ആണ് ചിത്രത്തിലെ നായിക. ഇന്ന് രാവിലെ 10 മണിക്കാണ് ടീസർ പുറത്തിറക്കിയത്. കാഞ്ഞിരപ്പള്ളി,മുണ്ടക്കയം,കുമളി എന്നീ സ്ഥലങ്ങളിലായാണ് സിനിമയുടെ ചിത്രീകരണം പൂർത്തിയാക്കിയിരിക്കുന്നത്. രണ്ടു ഷെഡ്യുൾ ആയിട്ടാണ് ചിത്രീകരണം പൂർത്തിയാക്കിയത്.
ചിത്രത്തിൻറെ ആദ്യ ഷെഡ്യുൾ ഏപ്രിൽ മാസത്തിലാണ് ആരംഭിച്ചത്. തുടർന്ന് കോവിഡ് വ്യാപനം രൂക്ഷമായതോടെ ചിത്രീകരണം താൽക്കാലികമായി നിർത്തി വെയ്ക്കുകയായിരുന്നു. രണ്ടാം ഷെഡ്യുൾ ഒക്ടോബർ-നവംബർ മാസങ്ങളിലായി കാഞ്ഞിരപ്പള്ളിയിൽ പൂർത്തിയാക്കി.
ഇതിനോടകംതന്നെ ചിത്രത്തിൻറെ പോസ്റ്ററുകൾ സാമൂഹിക മാധ്യമങ്ങളിൽ തരംഗമായി മാറിയിരുന്നു. പൃഥ്വിരാജ് പ്രൊഡക്ഷൻസിന്റെയും മാജിക് ഫ്രെയിംസിന്റെയും ബാനറിൽ ലിസ്റ്റിൻ സ്റ്റീഫൻ, സുപ്രിയ മേനോൻ എന്നിവർ ചേർന്നാണ് ചിത്രത്തിൻറെ നിർമ്മാണം. ജിനു വി എബ്രഹാമാണ് തിരക്കഥ.
