കാഞ്ഞിരപ്പള്ളി: കാഞ്ഞിരപ്പള്ളിയിൽ സ്കൂട്ടറിന് പിന്നിൽ സ്വകാര്യ ബസ്സിടിച്ച് യാത്രക്കാരിക്ക് പരിക്ക്. ദേശീയ പാതയിൽ കാഞ്ഞിരപ്പള്ളി സ്വകാര്യ ബസ്സ് സ്റ്റാൻഡിനു മുന്നിലാണ് അപകടം ഉണ്ടായത്.
അപകടത്തിൽ സ്‌കൂട്ടർ യാത്രികയ്ക്ക് പരിക്കേറ്റു. അത്ഭുതകരമായാണ് വലിയൊരു അപകടത്തിൽ നിന്നും സ്‌കൂട്ടർ യാത്രിക രക്ഷപ്പെട്ടത്. എരുമേലിയിൽ നിന്നും പാലായ്ക്ക് പോകാനെത്തിയ ബസ്സ് സ്വകാര്യ ബസ്സ് സ്റ്റാൻഡിലേക്ക് കയറുന്ന ഭാഗത്തേക്ക് തിരിഞ്ഞപ്പോഴാണ് അപകടം ഉണ്ടായത്.
അപകടം കണ്ടു ഓടിയെത്തിയ ഓട്ടോ ഡ്രൈവർമാരും വ്യാപാരികളും ബസ്സ് ജീവനക്കാരും ചേർന്ന് സ്‌കൂട്ടർ യാത്രികയെ ആശുപത്രിയിൽ പ്രവേശിപ്പിച്ചു. സ്റ്റാൻഡിലേക്ക് കയറാനായി എത്തിയ ബസ്സ് ഇടതുവശം ചേർന്നപ്പോൾ സ്‌കൂട്ടറിൽ ഇടിക്കുകയായിരുന്നു എന്ന് ദൃക്‌സാക്ഷികൾ പറഞ്ഞു.
ഇടിയുടെ ആഘാതത്തിൽ സ്‌കൂട്ടറും യാത്രികയും റോഡിലേക്ക് മറിയുകയായിരുന്നു. ബസ്സിന്റെ എതിർ വശത്തേക് സ്‌കൂട്ടർ മറിഞ്ഞതിനാൽ വലിയൊരു ദുരന്തമാണ് ഒഴിവായത്.
