കാഞ്ഞിരപ്പള്ളി: കാഞ്ഞിരപ്പള്ളിയിൽ നിയന്ത്രണംവിട്ട കാർ കലുങ്കിൽ ഇടിച്ചുകയറി 2 പേർക്ക് പരിക്ക്. കാഞ്ഞിരപ്പള്ളി ഈരാറ്റുപേട്ട റോഡിൽ കപ്പാട് പള്ളിപ്പടിക്ക് സമീപമാണ് അപകടം ഉണ്ടായത്.
പുലർച്ചെ രണ്ടരയോടെയാണ് അപകടം ഉണ്ടായത്. നിയന്ത്രണംവിട്ട കാർ റോഡരികിലെ കലുങ്കിലേക്ക് ഇടിച്ചു കയറുകയായിരുന്നു. അപകടത്തിൽ വാഹനത്തിന്റെ മുൻഭാഗത്തുണ്ടായിരുന്നവരെ നാട്ടുകാരും പോലീസും അഗ്നിരക്ഷാ സേനയുമെത്തിയാണ് പുറത്തെടുത്തത്. ഇരുവരുടെയും കാലുകൾ വാഹനത്തിനും കലുങ്കിനുമിടയിലായി കുടുങ്ങിക്കിടക്കുകയായിരുന്നു.
അപകടസമയം അതുവഴി എത്തിയ ലോറിക്കാരാണ് നാട്ടുകാരെ വിവരമറിയിച്ചത്. വാഹനത്തിലുണ്ടായിരുന്ന ഇരുവരുടെയും കാലുകൾക്ക് പരിക്കുണ്ട്. ഇരുവരെയും കാഞ്ഞിരപ്പള്ളി ജനറൽ ആശുപത്രിയിൽ പ്രവേശിപ്പിച്ചു. ഡ്രൈവർ ഉറങ്ങിപ്പോയതാകാം അപകടകാരണമെന്നാണ് പ്രാഥമിക നിഗമനം.
