തലയോലപ്പറമ്പ്: കോട്ടയം തലയോലപ്പറമ്പിൽ ആക്രിക്കടയിൽ വൻ തീപിടുത്തം. തലയോലപ്പറമ്പിൽ ചന്തയ്ക്ക് സമീപം വാഹനങ്ങൾ പൊളിച്ചു നീക്കുന്ന ആക്രിക്കടയിൽ ആണ് തീ പിടുത്തമുണ്ടായത്. പൊളിച്ചു കൊണ്ടിരുന്ന വാഹനത്തിൻറെ ഡീസൽ ടാങ്ക് വെൽഡിങ് സ്പാർക്ക് മൂലം തീപിടിച്ചതാണ് അപകട കാരണം.
അപകടത്തിൽ 3 അന്യസംസ്ഥാന തൊഴിലാളികൾക്ക് പൊള്ളലേറ്റു. 2 പേരുടെ നില ഗുരുതരമാണ്. അപകടത്തിൽ പരിക്കേറ്റവരെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. വാഹനം പൊളിക്കുന്ന ജോലികൾ ചെയ്തിരുന്ന ബീഹാർ സ്വദേശികളായ ശർവൻ, രാജ്കുമാർ, അഭിജിത്ത് എന്നിവർക്കാണ് അപകടത്തിൽ പരിക്കേറ്റത്.
നാട്ടുകാർ വിവരമറിയിച്ചതനുസരിച്ച് പോലീസും അഗ്നിരക്ഷാ സേനയും സ്ഥലത്ത് എത്തിയിരുന്നു. വൈക്കത്തുനിന്നും കടുത്തുരുത്തിയിൽ നിന്നുമുള്ള അഗ്നിരക്ഷാ സേനാ സംഘമെത്തിയാണ് തീ അണച്ചത്. പൊളിക്കുന്നതിനായി സ്ഥലത്തുണ്ടായിരുന്ന മറ്റു വാഹനങ്ങളിലേക്കും തീ പടർന്നിരുന്നു.
