പാലാ: പാലാ നിയോജക മണ്ഡലത്തിൽ യുഡിഎഫ് സർക്കാർ തുടക്കം കുറിച്ച രാമപുരം,കടപ്പാട്ടൂർ ഉൾപ്പെടെയുള്ള കുടിവെള്ള പദ്ധതികൾ സാങ്കേതികത്വത്തിന്റെ പേരിൽ തടസ്സപ്പെടുത്തുന്നത് അവസാനിപ്പിക്കണമെന്നും പദ്ധതികൾ പൂർത്തീകരിക്കാൻ ജലവിഭവ വകുപ്പുമന്ത്രി ആന്മാർത്ഥത കാണിക്കണമെന്നും കേരളാ കോൺഗ്രസ് വർക്കിംഗ് ചെയർമാനും മുൻ എംപി യുമായ പി.സി തോമസ് ആവശ്യപ്പെട്ടു.
മേഖലയിലെ രൂക്ഷമായ കുടിവെള്ളക്ഷാമം പരിഹരിക്കണമെന്ന് ആവശ്യപ്പെട്ട് നിയോജക മണ്ഡലം കമ്മറ്റിയുടെ ആഭിമുഖ്യത്തിൽ താലൂക്ക് ഓഫീസിനു മുമ്പിൽ നടത്തിയ ധർണ്ണ ഉദ്ഘാടനം ചെയ്യുകയായിരുന്നു അദ്ദേഹം. ഭരണത്തിൽ പങ്കാളിത്തമുള്ളവർ നിവേദനം നൽകുന്നതിനു പകരം വികസന പ്രവർത്തനങ്ങൾക്ക് നേതൃത്വം നൽകി ജനങ്ങളെ സഹായിക്കണം. വികസനത്തിന് രാഷ്ടീയം വേണ്ട എന്ന നിലപാടുള്ള എംഎൽഎ യോട് സഹകരിക്കാൻ എല്ലാവരും തയ്യാറാകണമെന്ന് പി.സി തോമസ് ആവശ്യപ്പെട്ടു.
പ്രസിഡന്റ് ജോർജ് പുളിങ്കാട് അദ്ധ്യക്ഷത വഹിച്ചു. കേരളാ കോൺഗ്രസ് സംസ്ഥാന സെക്രട്ടറി ജനറൽ ജോയി എബ്രാഹം എക്സ് എം.പി മുഖ്യപ്രഭാഷണം നടത്തി. ജില്ലാ പ്രസിഡന്റ് സജി മഞ്ഞക്കടമ്പിൽ സമര പ്രഖ്യാപനം നടത്തി. ജില്ലാ പഞ്ചായത്ത് മെമ്പർ ജോസ് മോൻ മുണ്ടയ്ക്കൻ ആമുഖ പ്രസംഗം നടത്തി. തോമസ് ഉഴുന്നാലിൽ,സന്തോഷ് കാവുകാട്ട്, ജോഷി വട്ടക്കുന്നേൽ, മത്തച്ചൻ പുതിയിടത്തു ചാലിൽ,മത്തച്ചൻ അരീപ്പറമ്പിൽ, ജോസ് വടക്കേക്കര, സിബി നെല്ലൻകുഴിയിൽ, പി.കെ ബിജു, ലിറ്റോ പാറേക്കാട്ടിൽ, നോയൽ ലൂക്ക്, സിബി വരിക്കമാക്കൽ, തുടങ്ങിയവർ പങ്കെടുത്തു.
