കോട്ടയം തലയോലപ്പറമ്പിൽ നിയന്ത്രണംവിട്ട ട്രാവലറും ബൈക്കും കൂട്ടിയിടിച്ച് വെള്ളൂർ സ്റ്റേഷനിലെ എസ് ഐ ക്ക് ദാരുണാന്ത്യം, അപകടം ജോലി കഴിഞ്ഞു വീട്ടിലേക്ക് മടങ്ങുന്ന വഴി.

തലയോലപ്പറമ്പ്: കോട്ടയം തലയോലപ്പറമ്പിൽ നിയന്ത്രണംവിട്ട ട്രാവലറും ബൈക്കും കൂട്ടിയിടിച്ച് വെള്ളൂർ സ്റ്റേഷനിലെ എസ് ഐ ക്ക് ദാരുണാന്ത്യം. വെള്ളൂർ പോലീസ് സ്റ്റേഷനിലെ ഗ്രേഡ് എസ് ഐ സജി(53) ആണ് അപകടത്തിൽ മരിച്ചത്.

ഇന്നലെ രാത്രി 9 മണിയോടെ പൊതി പാലത്തിന് സമീപമാണ് അപകടം ഉണ്ടായത്. സ്റ്റേഷനിൽ നിന്നും ജോലി കഴിഞ്ഞു വീട്ടിലേക്ക് മടങ്ങുകയായിരുന്ന സജി സഞ്ചരിച്ചിരുന്ന ബൈക്കിലേക്ക് നിയന്ത്രണംവിട്ട ട്രാവലർ ഇടിക്കുകയായിരുന്നു. അപകടത്തിൽ ഗുരുതരമായി പരിക്കേറ്റ സജിയെ കോട്ടയം തെള്ളകത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

ഇടിയുടെ ആഘാതത്തിൽ റോഡിലേക്ക് തെറിച്ചു വീണ സജിയെ അപകടം കണ്ടു ഓടിയെത്തിയ നാട്ടുകാരാണ് ആശുപത്രിയിൽ എത്തിച്ചത്. സംഭവത്തിൽ തലയോലപ്പറമ്പ് പോലീസ് സ്ഥലത്തെത്തി മേൽനടപടികൾ സ്വീകരിച്ചു. മൃതദേഹം പോസ്റ്റ്‌മോർട്ടം നടപടികൾക്കായി കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി. ഭാര്യ- ജെസ്സി,മക്കൾ- ആന്മരിയ,ആൽബർട്ട്.