കോട്ടയം: രണ്ടാം പിണറായി വിജയൻ സർക്കാരിന്റെ ഒന്നാം വാർഷികാഘോഷം കോട്ടയം നാഗമ്പടം മൈതാനത്ത് സംഘടിപ്പിക്കുന്നു. 2022 ഏപ്രിൽ 28 മുതൽ മേയ് 4 വരെ നടക്കുന്ന 'എന്റെ കേരളം' പ്രദർശന-വിപണന മേളയിൽ സർക്കാർ വകുപ്പുകളുടെയും പൊതുമേഖലാ സ്ഥാപനങ്ങളുടെയും 155 സ്റ്റാളുകൾ ഒരുക്കിയിട്ടുണ്ട്. കേരളത്തിന്റെ വിനോദസഞ്ചാരമേഖലയിലെ പ്രത്യേകതകൾ വ്യക്തമാക്കുന്ന 'കേരളത്തെ അറിയാം' പ്രദർശനം, കേരളത്തിന്റെ ചരിത്രം, അഭിമാനം, നേട്ടങ്ങൾ, പ്രതീക്ഷ, ഭാവി എന്നിവ പ്രതിഫലിപ്പിക്കുന്ന 'എന്റെ കേരളം' പ്രദർശനം, ജില്ലയിലെ വിവിധ സാങ്കേതിക വിദ്യാഭ്യാസ സ്ഥാപനങ്ങളും സ്റ്റാർട്ടപ്പുകളും നവീന സങ്കേതങ്ങൾ പരിചയപ്പെടുത്തുന്ന 'ടെക്നോ ഡെമോ' പ്രദർശനം, കാർഷിക പ്രദർശന-വിപണന മേള, സാംസ്‌കാരിക-കലാപരിപാടികൾ, വൈവിധ്യമാർന്ന രുചിക്കൂട്ടുകൾ പരിചയപ്പെടുത്തുന്ന ഭക്ഷ്യമേള എന്നിവ ഇതിന്റെ ഭാഗമായി നടക്കും. പ്രവേശനം സൗജന്യം.
