എരുമേലി: എരുമേലി പ്ലാച്ചേരിയിൽ നിയന്ത്രണംവിട്ട കാർ വൈദ്യുതി പോസ്റ്റിലിടിച്ചു മറിഞ്ഞു യുവാവിന് ദാരുണാന്ത്യം. റാന്നി മക്കപ്പുഴ സ്വദേശി പ്ലാമൂട്ടിൽ സഞ്ജു തോമസ് (22) ആണ് മരിച്ചത്. ഇന്ന് രാവിലെ 11 മണിക്ക് എരുമേലി പ്ലാച്ചേരിയിൽ ആണ് അപകടം ഉണ്ടായത്.
സഞ്ജു സഞ്ചരിച്ചിരുന്ന കാർ നിയന്ത്രണംവിട്ടു പോസ്റ്റിൽ ഇടിച്ച ശേഷം റോഡിൽ നിന്നും താഴ്ചയിലേക്ക് മറിയുകയായിരുന്നു. അപകടത്തിൽ റോഡിൽ നിന്നും മുപ്പതടിയോളം താഴ്ച്ചയിലേക്ക് മറിഞ്ഞ കാറിൽ നിന്നും ഏറെ പ്രയാസപ്പെട്ടാണ് സഞ്ജുവിനെ പുറത്തെടുത്തത്.
അപകട വിവരം നാട്ടുകാർ അറിയിച്ചതിനെ തുടർന്ന് മണിമല പോലീസും റാന്നിയിൽ നിന്ന് അഗ്നി രക്ഷാ സേനയും സ്ഥലത്ത് എത്തിയാണ് സഞ്ജുവിനെ പുറത്തെടുത്തത്. അപകടത്തിൽ ഗുരുതരമായി പരിക്കേറ്റ സഞ്ജുവിനെ ഉടനെ തന്നെ കാഞ്ഞിരപ്പള്ളി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വാഹനം അമിത വേഗത്തിൽ എത്തിയാണ് പോസ്റ്റിൽ ഇടിച്ചു മറിഞ്ഞതെന്നു ദൃക്സാക്ഷികൾ പറഞ്ഞു.
