എരുമേലി: എരുമേലിയിൽ നിയന്ത്രണംവിട്ട സ്‌കൂട്ടർ ഓട്ടോറിക്ഷയിലിടിച്ചുണ്ടായ അപകടത്തിൽ വയോധികന് ദാരുണാന്ത്യം. വെച്ചൂച്ചിറ ചെമ്പനോലിൽ ആരിശ്ശേരിൽ എ എം മാത്യു(കുഞ്ഞുമോൻ-67) ആണ് മരിച്ചത്.
തിങ്കളാഴ്ച ഉച്ചകഴിഞ്ഞു രണ്ടരയോടെ എരുമേലി-റാന്നി റോഡിൽ കരിങ്കല്ലുംമൂഴിക്കും ഫോറസ്റ്റ് റെയിഞ്ച് ഓഫിസിനും ഇടയ്ക്കാണ് അപകടം ഉണ്ടായത്. നിയന്ത്രണംവിട്ട സ്‌കൂട്ടർ ഓട്ടോറിക്ഷയിൽ ഇടിച്ചു മറിയുകയായിരുന്നു. അപകടത്തിൽ സ്‌കൂട്ടർ ഇടിച്ചു ഓട്ടോറിക്ഷയും റോഡിൽ മറിഞ്ഞു. ഓട്ടോറിക്ഷയിലെ യാത്രക്കാർക്കും അപകടത്തിൽ പരിക്കേറ്റിട്ടുണ്ട്. അപകടം കണ്ടു ഓടിയെത്തിയ നാട്ടുകാർ കുഞ്ഞുമോനെ ആദ്യം എരുമേലി സർക്കാർ ആശുപത്രിയിലും പിന്നീട് കോട്ടയം മെഡിക്കൽ കോളേജ് ആശുപത്രിക്കും പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. അപകടത്തിൽ കുഞ്ഞുമോന്റെ തലയ്ക്ക് ഗുരുതരമായി പരിക്കേറ്റിരുന്നു. എരുമേലി പോലീസ് സ്ഥലത്തെത്തി മേൽനടപടികൾ സ്വീകരിച്ചു. ലിസമ്മയാണ് ഭാര്യ. ലിജി,ലീന,ലിജോ എന്നിവർ മക്കളാണ്. സംസ്കാരം പിന്നീട്.
