ക്രിസ്മസ് ആവേശവുമായി കോട്ടയം, വിപണി സജീവം, ആഘോഷങ്ങൾ ആരംഭിക്കുന്നു...

കോട്ടയം: ക്രിസ്മസ് ആവേശവുമായി കോട്ടയം ആഘോഷങ്ങൾക്ക് ഒരുങ്ങിക്കഴിഞ്ഞു. ക്രിസ്മസ് ആഘോഷങ്ങൾ പൊടിപൊടിക്കാനൊരുങ്ങുകയാണ് കോട്ടയം. ഇതിനോടകം തന്നെ ക്രിസ്മസ് വിപണി സജീവമായിക്കഴിഞ്ഞു. കഴിഞ്ഞ ആഴ്ച മുതലാണ് ക്രിസ്മസ് വിപണി കൂടുതൽ ഉണർവ്വിലേക്ക് എത്തിയത്.

 

 നക്ഷത്രങ്ങളും പുൽക്കൂടുകളും ക്രിസ്മസ് ട്രീകളും അലങ്കാര ബൾബുകളുമടക്കം ക്രിസ്മസ് ആഘോഷ സാധനങ്ങൾ വാങ്ങുന്നതിനായി വ്യാപാര സ്ഥാപനങ്ങളിൽ തിരക്ക് വർധിച്ചു തുടങ്ങി. ക്രിസ്മസ് കരോളുകൾ അടുത്ത ദിവസങ്ങളിലായി ആരംഭിക്കുന്നതോടെ ആഘോഷങ്ങളുടെ മാറ്റ് കൂടും. വിപണി ഉണർന്നതോടെ വ്യാപാരികളും സന്തോഷത്തിലാണ്. ബേക്കറികളിൽ ഉൾപ്പടെ കേക്ക് മേളകൾ ആരംഭിച്ചു കഴിഞ്ഞു. വിവിധ തരം കേക്കുകൾ ഇപ്പോൾ വിപണിയിൽ ലഭ്യമായിക്കഴിഞ്ഞു. പള്ളികളിൽ ക്രിസ്മസ് ആഘോഷങ്ങളുടെ ഒരുക്കങ്ങൾ ആരംഭിച്ചു കഴിഞ്ഞു. വിലവർദ്ധനവ് ഈ വർഷം വലിയതോതിൽ ഉണ്ടായിട്ടില്ല എന്നും വ്യാപാരികൾ പറഞ്ഞു. പേപ്പർ നക്ഷത്രങ്ങൾ,പ്ലാസ്റ്റിക്ക് കോട്ടിങ് നക്ഷത്രങ്ങൾ,ഇലക്ട്രോണിക്ക് ഓട്ടോമാറ്റിക്ക് നക്ഷത്രങ്ങൾ,ക്രിസ്മസ് ട്രീ,പുൽക്കൂടുകൾ,ഓട്ടോമാറ്റിക്ക് അലങ്കാര ബൾബുകൾ തുടങ്ങി നിരവധി ക്രിസ്മസ് ആഘോഷ സാധനങ്ങൾ വിപണിയിൽ ലഭ്യമാണ്. വീടുകളിലും ക്രിസ്മസിന്റെ വരവറിയിച്ചു നക്ഷത്രങ്ങളും ക്രിസ്മസ് ട്രീകളും ഒരുങ്ങിക്കഴിഞ്ഞു. രാത്രിയിൽ നഗരങ്ങളിലെ വ്യാപാര സ്ഥാപനങ്ങൾ സമ്മാനിക്കുന്നത് വർണ്ണശബളമായ നക്ഷത്രത്തിളക്കമുള്ള കാഴ്ചകളാണ്. വരും ദിവസങ്ങളിൽ വ്യാപാരം വർധിക്കുമെന്ന് പ്രതീക്ഷയിലാണ് വ്യാപാരികൾ.