കോട്ടയം: ഡിണ്ടിഗൽ സിരുമലയിൽ കോട്ടയം ഇളങ്ങുളം സ്വദേശി കൊല്ലപ്പെട്ടത് അബദ്ധത്തിലുണ്ടായ സ്ഫോടനം കാരണമാണെന്നു പോലീസ്. ചെങ്ങളം ഒട്ടയ്ക്കൽ കൊച്ചിലാത്ത് സാബു ജോൺ (59) ആണ് കൊല്ലപ്പെട്ടത്.
വ്യാഴാഴ്ച രാത്രി ചുരം റോഡിലെ സിരുമലയിൽ നിന്നുമാണ് മൃതദേഹം കണ്ടെത്തിയത്. മൊബൈൽ ഫോൺ ചാർജറും വയറുകളും ബാറ്ററിയും സമീപത്തു നിന്നും കണ്ടെത്തിയിരുന്നു. സംഭവത്തിൽ ഡിണ്ടിഗൽ പൊലീസിന്റെ പ്രത്യേകസംഘം കേരളത്തിലെത്തി ബന്ധുക്കളിൽ നിന്നും വിവരങ്ങൾ ശേഖരിച്ചെങ്കിലും ദുരൂഹതയില്ലെന്നു സ്ഥിരീകരിച്ചു. സ്ഫോടനത്തിന്റെ സൂചനകളുണ്ടായിരുന്നതിനാൽ എൻഐഎ ഉൾപ്പെടെയുള്ള അന്വേഷണ സംഘങ്ങൾ സ്ഥലത്തെത്തിയിരുന്നു. കൃഷിത്തോട്ടത്തിലെ ആവശ്യങ്ങൾക്കായി കേരളത്തിൽനിന്ന് കൊണ്ടുവന്ന സ്ഫോടകവസ്തുക്കൾ പരിശോധിക്കുന്നതിനിടെയാണ് സ്ഫോടനം ഉണ്ടായതെന്നും പോലീസ് സ്ഥിരീകരിച്ചു. കൃഷിയിടത്തിൽ കിണർ കുഴിക്കുന്നതിനായാണു ജലറ്റിൻ സ്റ്റിക് അടക്കം വാങ്ങിയിരുന്നു.
