കോട്ടയം: ആരോഗ്യ മേഖലയിലെ സമഗ്ര സംഭാവനയ്ക്ക് കോട്ടയം മെഡിക്കല്‍ കോളേജ് സൂപ്രണ്ടും പ്രശസ്ത കാര്‍ഡിയോ തൊറാസിക് സര്‍ജനുമായ ഡോ. ജയകുമാറിനു സംസ്ഥാന സർക്കാർ നൽകുന്ന പരമോന്നത സംസ്ഥാന പുരസ്‌കാരമായ കേരള ശ്രീ പുരസ്കാരം.
വിവിധ മേഖലകളിൽ സമൂഹത്തിന് സമഗ്ര സംഭാവനകൾ നൽകിയ വിശിഷ്ട വ്യക്തിത്വങ്ങൾക്ക് സംസ്ഥാന സർക്കാർ നൽകുന്ന പരമോന്നത സംസ്ഥാന പുരസ്‌കാരമാണ് കേരള ജ്യോതി, കേരള പ്രഭ,കേരള ശ്രീ പുരസ്കാരങ്ങൾ. ആരോഗ്യ മേഖലയിലെ സമഗ്ര സംഭാവനയ്ക്ക് കേരള ശ്രീ പുരസ്കാരം ലഭിച്ച കോട്ടയം മെഡിക്കല്‍ കോളേജ് സൂപ്രണ്ടും പ്രശസ്ത കാര്‍ഡിയോ തൊറാസിക് സര്‍ജനുമായ ഡോ. ജയകുമാറിനെ ആരോഗ്യ മന്ത്രി വീണാ ജോർജ് അഭിനന്ദിച്ചു.
പുരസ്കാരം ഗവർണ്ണറിൽ നിന്നും ഡോ. ജയകുമാർ ഏറ്റുവാങ്ങി. രാജ്ഭവനിൽ മുഖ്യമന്ത്രി അധ്യക്ഷനായ ചടങ്ങിൽ ഗവർണർ രാജേന്ദ്ര അർലേക്കറാണ് പുരസ്കാരങ്ങൾ സമ്മാനിച്ചത്. വിവിധ മേഖലകളിൽ മികവ് തെളിയിച്ച ഒൻപത് പേർ പുരസ്കാരങ്ങൾ ഏറ്റുവാങ്ങി. സ്പീക്കർ എ എൻ ഷംസീർ, മന്ത്രിമാരായ കെ രാജൻ, ജി ആർ അനിൽ, പി പ്രസാദ്, വീണാ ജോർജ്, ഒ ആർ കേളു, വി എൻ വാസവൻ, രാമചന്ദ്രൻ കടന്നപ്പള്ളി, സജി ചെറിയാൻ, എ കെ ശശീന്ദ്രൻ, ചീഫ് സെക്രട്ടറി ശാരദാ മുരളീധരൻ, അടൂർ ഗോപാലകൃഷ്ണൻ, എംഎൽഎമാർ, രാഷ്ട്രീയ, സാമൂഹിക, സാംസ്‌കാരിക രംഗത്തെ പ്രമുഖർ എന്നിവർ ചടങ്ങിൽ സംബന്ധിച്ചു.
